Olimlar Churyumov-Gerasimenko kometasi yadrosi yuzasining “Fili” ilmiy moduli qo‘ngan vaqtida olingan ilk suratlarini qo‘lga kiritdi. Bu haqda Yevropa kosmik agentligiga tayanib, “RIA Novosti” xabar bermoqda.
Birinchi surat modul bortidagi ROLIS kamerasi orqali kometa yadrosi yuzasidan taxminan uch kilometr masofadan olingan.
Eslatib o‘tamiz, Yevropaning “Rozetta” nomli zondi (atmosferaning yuqori qatlamlarini tekshirish uchun mo‘ljallangan apparat)ning tushiriladigan moduli — “Fili” Toshkent vaqti bilan 12-noyabr soat 21:03 da Churyumov-Gerasimenko kometasiga qo‘ndi. Tarkibida “Fili” moduli bo‘lgan “Rozetta” apparati fazoga 2004-yil mart oyida Fransuz Gvianasida joylashgan Kuru kosmodromidan uchirilgan edi.
“Fili” kometa tuprog‘idan namunalar olish uchun maxsus qurilma, spektrometr, fotokamera va zarralarni tahlil qiluvchi uskunalar bilan ta’minlangan. Mazkur jihozlar 4,5 milliard yil avval paydo bo‘lganidan beri o‘zgarmay kelayotgan kometani o‘rganishga yordam beradi. Mutaxassislar mazkur noyob missiyaga “fazoviy arxeologiya” deb nom berdi.
Izoh (0)