Yangi virus minglab Apple gadjetlarini zararlayotgani xabar qilindi

Palo Alto Networks kiber-xavfsizlik kompaniyasi WireLuker deb nomlangan, “tarixdagi eng keng qamrovli” virus Apple gadjetlariga hujum qilayotganini e’lon qildi. Bu haqda LookAtMe ma’lumotiga asoslanib “Parol” nashri xabar berdi.

Bu virus Xitoyning Maiyadi nomli dasturlar do‘konidan tarqalmoqda. Bunda nafaqat virus bilan zararlangan qurilma egalari, balki boshqalar ham zarar ko‘radi. Mutaxassislarning so‘zlariga ko‘ra, ushbu virus deyarli istalgan ma’lumotni (ular orasida to‘lov ham mavjud) o‘g‘irlay oladi.

Virus Mac kompyuterlarining 400 ta dasturini zararlashga ulgurgan. Bu dasturlar esa Maiyadi do‘koni orqali 350 000 martadan ko‘proq yuklab olingan. Zararlangan kompyuterga USB orqali smartfon yoki planshet ulansa, ularga ham WireLuker virusi o‘tadi. Virus yuz minglab Apple qurilmalarini zararlashi taxmin qilinmoqda.

WireLuker virusining yaratilishidan yakuniy maqsad nima ekanligi hozircha noma’lum. Virusni yaratganlar uni hozirda sinovdan o‘tkazayotgandek ko‘rinishmoqda.

Apple kompaniyasi WireLuker virusi haqida biror ma’lumot keltirgani yo‘q. Palo Alto Networks xodimlari esa Apple foydalanuvchilarini litsenziyasiz dasturlarni o‘rnatmaslik va ommabop bo‘lmagan kompaniyalarning USB-quvvatlagichlaridan foydalanmaslikni tavsiya qilmoqda.

Shuningdek, “Parol” nashrida quyidagi maqolalarni ham o‘qishingiz mumkin:

• Google va Apple muhandislari smayliklarni yanada turli xil qilish ustida ishlamoqda;
• Yangi Google Nexus 9 plansheti batareyasining quvvati eng uzoqqa yetadigan deb topildi;
• Apple Watch aqlli soati 14-fevral kuni 500 dan 5000 dollargacha narxda sotila boshlanishi mumkin.