AQShlik tadbirkor Filipp Lexter oila a’zolari bilan ot-aravada sayr qilayotgan vaqtda shimining cho‘ntagidagi iPhone 6 Plus’ni arava chetiga urib oldi. Yap-yangi smartfon cho‘ntak ichida egilib, yonib ketdi, deya xabar bermoqda Mail.ru.
Foydalanuvchi ushbu hodisadan keyin kiyimlari va smartfoni, shuningdek tanasining kuygan qismini suratga olib, o‘z blogiga joyladi.
Uning yozishicha, telefon yongach juda quyuq tutun paydo bo‘lgan. U zudlik bilan smartfonni cho‘ntagidan chiqargan, atrofidagilardan biri uning oyog‘iga suv quygan, yana kimdir voqeani kameraga muhrlagan.
Ta’kidlash joiz, bu iPhone 6 Plus smartfonining egilib ketishi bilan bog‘liq birinchi holat bo‘lmasa-da, uning kiyim cho‘ntagida yonib ketishi borasida ilk hodisadir.
Eslatib o‘tamiz, avvalroq Apple kompaniyasining yangi iPhone 6 Plus smartfoni jinsi shimlarning cho‘ntagida buklanib qolishi haqida mish-mish tarqalgan edi. Shundan so‘ng, ushbu smartfonni qo‘l bilan ham oson buklash mumkinligi haqida video taqdim etildi va #BendGate xeshtegi bilan Apple’ni masxara qilish boshlandi. Deyarli barcha kompaniyalar ushbu imkoniyatni qo‘ldan chiqarmadi.
Izoh (0)