30-oktabr kuni Toshkentda Turkiya Respublikasi e’lon qilinganiga 91 yil to‘lgani munosabati bilan bayram tadbiri bo‘lib o‘tdi, deya xabar bermoqda Gazeta.uz.
Tadbirda Turkiya elchisi Namiq Gyuner Erpul o‘z mamlakati prezidenti Rajab Toyyib Erdo‘g‘onning tabrik nutqini o‘qib berdi. Unda Turkiya prezidenti do‘st va birodar mamlakatlarni ushbu qutlug‘ sana bilan muborakbod etgan.
Turkiya tomonidan 91 yil ichida bosib o‘tilgan yo‘l haqida gapirar ekan, elchi nafaqat iqtisodiyot, balki boshqa qator sohalarda erishilgan muvaffaqiyatlarni tilga oldi.
Ta’kidlash joiz, Turkiya 1991-yil 16-dekabr kuni O‘zbekiston mustaqilligini tan olgan birinchi mamlakat bo‘ldi. 1992-yil 2-martda esa ikki davlat o‘rtasida diplomatik aloqalar o‘rnatilib, Turkiyaning Toshkentdagi vakolatxonasi ochildi.
“O‘zbekiston Turkiya tarixida alohida o‘rin tutadi, — dedi diplomat. — Turkiya xalqi O‘zbekistonni o‘z ajdodlari mamlakati, o‘zbek xalqini esa o‘z qardoshlari deb biladi”.
Bugungi kunda Turkiya O‘zbekistonning tashqi savdo bo‘yicha eng yirik besh hamkoridan biridir. 2013-yilda mamlakatlarimiz o‘rtasida tovar aylanmasi 1 milliard 347 million AQSh dollarini tashkil etdi va bu 2012-yilga nisbatan 10,5 foiz ko‘pdir. O‘zbekistonda Turkiya sarmoyasi ishtirokida 485 korxona faoliyat yuritmoqda.
Izoh (0)