30 октябрь куни Тошкентда Туркия Республикаси эълон қилинганига 91 йил тўлгани муносабати билан байрам тадбири бўлиб ўтди, дея хабар бермоқда Gazeta.uz.
Тадбирда Туркия элчиси Намиқ Гюнер Эрпул ўз мамлакати президенти Ражаб Тоййиб Эрдўғоннинг табрик нутқини ўқиб берди. Унда Туркия президенти дўст ва биродар мамлакатларни ушбу қутлуғ сана билан муборакбод этган.
Туркия томонидан 91 йил ичида босиб ўтилган йўл ҳақида гапирар экан, элчи нафақат иқтисодиёт, балки бошқа қатор соҳаларда эришилган муваффақиятларни тилга олди.
Таъкидлаш жоиз, Туркия 1991 йил 16 декабрь куни Ўзбекистон мустақиллигини тан олган биринчи мамлакат бўлди. 1992 йил 2 мартда эса икки давлат ўртасида дипломатик алоқалар ўрнатилиб, Туркиянинг Тошкентдаги ваколатхонаси очилди.
«Ўзбекистон Туркия тарихида алоҳида ўрин тутади, — деди дипломат. — Туркия халқи Ўзбекистонни ўз аждодлари мамлакати, ўзбек халқини эса ўз қардошлари деб билади».
Бугунги кунда Туркия Ўзбекистоннинг ташқи савдо бўйича энг йирик беш ҳамкоридан биридир. 2013 йилда мамлакатларимиз ўртасида товар айланмаси 1 миллиард 347 миллион АҚШ долларини ташкил этди ва бу 2012 йилга нисбатан 10,5 фоиз кўпдир. Ўзбекистонда Туркия сармояси иштирокида 485 корхона фаолият юритмоқда.
Изоҳ (0)