Android asoschilaridan biri Google’dagi ishidan bo‘shadi

Google’ning Android loyihasi asoschilaridan biri Endi Rubin kompaniyadagi faoliyatini yakunladi. Bu haqda The Verge ma’lumotiga asoslanib “Parol” nashri xabar berdi.

Rubin texnologiya startaplari uchun inkubator yaratish maqsadida Google’dan ketdi. U kompaniyaning robototexnika yo‘nalishida rahbar edi. Endilikda uning o‘rnini Google’da tadqiqotchi olim bo‘lib faoliyat olib boradigan Jeyms Kufner egallaydi.

Endi Rubin 2005-yilda Google’ning Android loyihasiga qo‘shilgan. O‘tgan yillar davomida u ushbu loyihani dunyodagi eng ommabop operatsion tizim darajasiga olib chiqish uchun katta yordam berdi. Uning Google’dan ketishi kutilgan yangilik bo‘lishi ham mumkin. Chunki, u mart oyida Android jamoasini tark etgan va uning o‘rniga Sundar Pichay tayinlangan edi.

Google rahbari Larri Peyj Endi Rubinning keyingi ishlarida omad tilab, milliarddan ortiq foydalanuvchilarga ega Android operatsion tizimi uchun unga o‘z minnatdorchiligini bildirdi.

Shuningdek, “Parol” nashrida quyidagi maqolalarni o‘qishingiz mumkin:

• HP kompaniyasi proyektorli klaviaturaga ega Sprout kompyuterini taqdim etdi (foto);
• Sobiq Google xodimi “kelajagi bor” to‘lov terminalini ishlab chiqardi (foto);
• Apple kompaniyasining 534 ta mahsuloti tasvirlangan plakat sotuvga chiqarildi.