“Layk qo‘yayotgan” Budda Tailanddagi ibodatxonalardan birini dunyoga tanitdi

Tailand janubidagi Songkxla provinsiyasida joylashgan Talod ibodatxonasi bosh barmog‘ini tepaga ko‘tarib turgan qadimgi Budda haykali tufayli sayyohlarning sevimli joyiga aylandi. Bu haqda “TASS” xabar berdi.

Qadimgi Ayuttxaya saltanati davriga tegishli bir metrli haykal Buddaning chordana qurib o‘tirgan holatini muhrlagan. Bir necha yuz yillar davomida ushbu yodgorlik katta e’tiborni jalb qilmagan: shunga o‘xshash haykallar Tailandda ko‘plab topiladi. Biroq yaqinda ibodatxonaga tashrif buyurganlardan biri Buddaning musht qilib siqilgan bir qo‘lining bosh barmog‘i yuqoriga qarab turganini sezib qoldi.

U o‘z kashfiyoti bilan ijtimoiy tarmoqlardan birida bo‘lishdi. “Layk qo‘yayotgan” Budda haqidagi yangilik Talod ibodatxonasini sanoqli kunlarda ommaviy ziyoratgohga aylantirdi.

Silpakorn universitetining san’at tarixi bo‘yicha professori Prapas Chuvikinning aytishicha, Buddaning shu qo‘lida aslida qandaydir buyum bo‘lgan.