Eron tashqi ishlar vaziri o‘rinbosari Abbos Arakchi Tehron o‘z yadroviy salohiyatini saqlab qolishga qat’iy qaror qilganini va birorta tadqiqot dasturi yopilmasligini ma’lum qildi, deb xabar bermoqda “Rossiyaskaya gazeta”.
Eron vakili AQSh davlat kotibi o‘rinbosari Uendi Shermanning Tehron mamlakat markazidagi Fordo uranni boyitish korxonasi yopishi lozimligi, shuningdek, “oltilik” davlatlari bilan o‘tkazilayotgan muzokaralar to‘xtatilishining har qanday sababi uchun javobgarlikni o‘z bo‘yniga olishi kerakligi haqidagi bayonotiga aynan shu tarzda javob bergan.
“Shubha yo‘qki, muzokaralarning o‘zi emas, balki ularning OAVda yoritilishi muammoni yechish o‘rniga jarayonning borishini sekinlashtiradi. Bizning muzokarachilar jamoamiz yadro dasturining tinch xarakterda ekanligi to‘g‘risidagi barcha gumonlarni yo‘qotish uchun harakat qilishga va kerak bo‘lsa uni xalqaro hamjamiyatga xulosa chiqarish uchun taqdim etishga tayyor. Eronning muzokaralardagi asosiy pozitsiyasi aniq va biz ishonchni mustahkamlash uchun barcha choralarni ko‘ramiz. Biroq Eron atom energiyasidan tinch yo‘ldan foydalanish bo‘yicha o‘zining qonuniy huquqlarini himoya qilishdan voz kechmaydi. Shuningdek, muzokaralar kelishilgan muddatda tugashiga ham kafolat yo‘q”, − dedi Arakchi.
Eron bilan 2013-yil noyabr oyida Jenevada bo‘lib o‘tgan muzokaralarda kelishuvga erishilgan edi. O‘shanda Tehron uranni boyitish dasturini muzlatib qo‘yishga, G‘arb davlatlari esa Eronga nisbatan sanksiyalarni kamaytirish, jumladan oltin sotish va neft bozorida ishlash borasidagi bosimni kamaytirishga rozi bo‘lgan edi.
Izoh (0)