Интернет ва ижтимоий тармоқлар имкониятларини суиистеъмол қилиш ножоиздир, замонавий оммавий коммуникация воситаларини ривожлантириш жараёнида барча халқлар манфаатларини ҳисобга олиш зарур. Бу ҳақда Эрон президенти Ҳасан Руҳоний «Россия 24» телеканалига берган интервьюсида айтиб ўтди, деб ёзади «РИА Новости».
Президент, шунингдек бугунги дунёда коммуникациялар муҳим рол ўйнаши, шунинг учун барча давлатлар ҳукуматлари фуқароларга «мувофиқ бўлган имкониятлар»ни тақдим этиши зарурлигини таъкидлади. Бироқ «баъзи халқлар риоя қилувчи диний эътиқод масалаларида ҳам, ахлоқ масалаларида ҳам ижтимоий тармоқларни суиистеъмол қилиш ярамайди», деди Руҳоний.
«Тармоқда халқни гиж-гижловчи ёки ушбу мамлакатларни хавф остига қўювчи нарсаларни ёзиш керак эмас. Мана шу йўлдан бориш ва барча халқлар манфаатларини эътиборга олиш керак», — дея таъкидлади у.
Ўзининг ўтган йилги сайловолди кампанияларидаёқ Руҳоний ОАВдаги цензурани заифлаштиришга ваъда берган эди. Экспертлар фикрича, айнан шу қадам унинг сайловлардаги ғалабасини таъминлаган.
2009 йилда Эрон раҳбариятига қарши норозилик авж олиб кетгач, ҳукумат матбуот эркинлиги ва интернетга уланишни кескин чеклади. Facebook, Twitter, Youtube ва бошқа сайтлар мамлакатда тақиқланди.
Изоҳ (0)