Қонунбузарлик учун милицияга тушадиган тожикистонлик болалар ва ўсмирлар у ёки бу шаклда зўравонликка учрайди. Бу ҳақда «Халқаро қамоқхона ислоҳоти» (RPI) ноҳукумат ташкилотининг Тожикистон Республикаси омбудсмани ҳамкорлигида ўтказган тадқиқотлари дарак бермоқда, деб ёзади BBC.
Олинган маълумотларга кўра, ҳуқуқни муҳофаза қилиш органлари ходимлари вояга етмаганлардан тан олувчи кўрсатмалар олиш учун ҳақорат ва жисмоний зўравонликдан фойдаланади.
Шунингдек, маърузада айтилишича, бундай қонунбузарликлар статистикаси олиб борилмайди, шундай ҳолатлар билан боғлиқ жиноий ишлар ҳафсаласизлик билан тергов қилинади. Зўравонлик қурбонлари эса қасос олишлари ва жазолашларидан қўрқиб, ҳуқуқни муҳофаза қилиш органларига мурожаат қилмайди.
Тадқиқот натижаларига кўра, сўровда қатнашган болаларнинг 38 фоизи уларни милицияда бир суткадан кўпроқ вақт ушлаб туришганини айтган, бу қонунга зиддир. Уларнинг 20 фоизи катталар билан битта камерада сақланган.
Ҳибсга олинган болалар ва ўсмирларнинг 37 фоизигагина юридик ёрдам таклиф этилган.
Халқаро қамоқхона ислоҳоти лойиҳасининг минтақавий мувофиқлаштирувчиси Азамат Шамбиловнинг айтишича, ҳибсдаги болаларга нисбатан зўравонлик кўпинча улар милицияга келтирилган пайтда юз беради. «Ўша вақтда уларнинг ёнида адвокат ёки ота-оналари бўлмаслиги ҳам мумкин. У ерда нималар содир бўлиши номаълум», — деди у.
Тожикистон ҳукумати мамлакатда бундай муаммолар борлигини яширмайди. Баъзи амалдорлар фикрича, бу, аввало, болалар ва ўсмирлар ўртасида жиноятчилик даражаси ошиб кетгани билан боғлиқ.
«Болалар орасида тажовузкорлик руҳининг ошишига мамлакатдаги ижтимоий-иқтисодий вазият, миграция ҳамда интернет сабаб бўлмоқда», — деди қонунчилик ва инсон ҳуқуқлари бўйича парламент қўмитаси раиси Маҳмадали Ватанов.
«Болаларни қонунни бузишга нима мажбур қилаётгани ҳақидаги савол муҳим эканлиги шубҳасиз, — деди сиёсатшунос Равшан Меликов. — Бироқ бу ерда гап уларнинг милицияга тушганида қандай муносабатга учраётгани ҳақида бормоқда».
Изоҳ (0)