3—4-sentabr kunlari, TeliaSonera guruhining 12 nafar asosiy sarmoyador vakillari va TeliaSonera rahbariyati O‘zbekistonga tashrif buyurdi, deya xabar bermoqda Ucell matbuot xizmati.
Tashrifning asosiy maqsadi, Ucell kompaniyasining faoliyati bilan yaqindan tanishish, TeliaSonera qabul qilgan ichki siyosati bo‘lmish Axloq Kodeksi, barqaror biznes yuritish standartlari Ucell tomonidan amalda qo‘llanilishini o‘rganib chiqish bo‘ldi. Mehmonlar Qozog’istondagi Ucell kompaniyasining sho‘ba korxonalaridan biri bo‘lmish Kcell kompaniyasidan O‘zbekistonga tashrif buyurdi. Sarmoyadorlar TeliaSonera, Kcell va Ucell vakillari o‘rtasida bo‘lib o‘tgan ochiq muloqot tarzidagi samarali uchrashuvlardan mamnun bo‘ldi.
O‘zbekistonga bo‘lgan tashrif davomida, Shvetsiya va Finlyandiya hukumati a’zolaridan tashkil topgan guruh, o‘zbek bozorining rivojlanishi, Ucell xodimlari bilan suhbat, hukumat hamda mahalliy biznes hamkorlar va xalqaro institutlar vakillari bilan uchrashuvlarni yuqori baholadi.
Shuningdek, tashrif davomida sarmoyadorlar TeliaSonera vitse-prezidenti va Yevrosiyo mintaqasi rahbari boshchiligida O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasining raisi — janob Xurshid Mirzohidov bilan uchrashishga muyassar bo‘ldi. Uchrashuv davomida, telekommunikatsiya xizmatlarini taqdim etuvchi mobil operatorlar bilan o‘zaro hamkorlik, O‘zbekistonda IT sohasini rivojlantirish hamda TeliaSonera kompaniyasi bilan kelajakda amalga oshiriladigan rejalar haqida so‘z bordi.
Tashrif buyurgan vakillar O‘zbekistonda jamiyat va guruh rivoji uchun ochiq hamda barqaror biznes yuritishga o‘z diqqat-e’tiborini qaratgan Ucell kompaniyasining faoliyatini yuqori baholadi. Kompaniya O‘zbekistonda amalga oshirilayotgan bir qator qonunlar, xalqaro normalar, TeliaSonera qabul qilgan Axloq kodeksiga, antikorrupsiya ichki dasturida keltirilgan qoidalarga amal qilishga harakat qilmoqda.
TeliaSonera katta vitse-prezidenti va korporativ kommunikatsiyalar guruhi rahbari Piter Borsos, O‘zbekistonga tashrifi doirasida quyidagilarni ta’kidladi: “Tashrif samarali o‘tganidan mamnunman. Sarmoyadorlarimizning fikricha, barqarorlik bo‘yicha yuzaga kelgan masalalarni Ucell kompaniyasi hal etib kelmoqda. Sarmoyadorlar guruhi a’zolari tashrif davomida olgan tassurotlaridan mamnun bo‘ldi. Barqaror biznes yuritish mavzusi doimiy izlanishlarni talab qilsa-da, Ucell to‘g‘ri yo‘lni tanlaganligi muhim ahamiyatga ega”.
2014-yilning 15-sentabridan Ucell bosh direktori lavozimini egallaydigan Tonu Gryunbergning ta’kidlashicha, sarmoyadorlarning tashrifi ayni muddao bo‘lib, Ucell har qachongidan ham faolroq rivojlanishi hamda yangi innavatsion xizmatlarni taqdim etish uchun sarmoya kiritishni davom ettiradi.
Izoh (0)