Pepsi kompaniyasi o‘zi e’lon qilgan aksiya shartlarini bajarmaslikda ayblanmoqda.
“Daryo” mobil muxbiri yutuqni so‘rab murojaat qilish uchun ko‘rsatilgan raqamga qo‘ng‘iroq qilib, faqat bir marta javob olganini, o‘shanda 6-sentabrda sovg‘ani qayerdan olib ketish haqida xabar berishni va’da qilishganini qayd etdi. “O‘shandan beri qo‘ng‘iroqlarga umuman javob berishmayapti”, — deya o‘z noroziligini izhor etdi mobil muxbir. U shuningdek, sovg‘alarning muhim emasligini, gap o‘z so‘zida turmasdan, odamlar ustidan kulish haqida borayotganini ta’kidladi.
Pepsi aksiyasi doirasida sovg‘alar taqdim etilishi yuzasidan boshqa ko‘plab shikoyatlarni ham kuzatish mumkin. Facebook’dagi “Jamoatchilik nazorati” guruhi a’zolaridan biri ham aksiya shartlarini bajarib, sovg‘a olish punktiga borgan kishilar ovoragarchilikka uchrayotgani haqida yozgan.
Ma’lum bo‘lishicha, avvaldan belgilab qo‘yilgan manzil boshqa joyga ko‘chirilgan, lekin bu haqda hech kim oldindan aniq ko‘rsatma bermagan. Bundan tashqari, taqdim etilgan sovg‘alar sifati ham kutilganidek bo‘lib chiqmagan. “Bunday sovg‘alar u yerga borish uchun ketgan vaqtingiz va pulingizga arzish-arzimasligini o‘zingiz hal qiling”, — deb yozadi foydalanuvchi.
Postga fikr bildirganlarning ko‘pchiligi aksiyadan xuddi shunday natijani kutganini qayd etgan. “Buning hayratlanarli joyi yo‘q”, — deb ta’kidladi ulardan biri.
Guruh a’zolarining yana bir qismi esa ular ham aksiyada ishtirok etmoqchi bo‘lganini, biroq xabarni o‘qib, hafsalasi pir bo‘lganini aytgan.
Izoh (0)