3—4 сентябрь кунлари, TeliaSonera гуруҳининг 12 нафар асосий сармоядор вакиллари ва TeliaSonera раҳбарияти Ўзбекистонга ташриф буюрди, дея хабар бермоқда Ucell матбуот хизмати.
Ташрифнинг асосий мақсади, Ucell компаниясининг фаолияти билан яқиндан танишиш, TeliaSonera қабул қилган ички сиёсати бўлмиш Ахлоқ Кодекси, барқарор бизнес юритиш стандартлари Ucell томонидан амалда қўлланилишини ўрганиб чиқиш бўлди. Меҳмонлар Қозоғистондаги Ucell компаниясининг шўба корхоналаридан бири бўлмиш Kcell компаниясидан Ўзбекистонга ташриф буюрди. Сармоядорлар TeliaSonera, Kcell ва Ucell вакиллари ўртасида бўлиб ўтган очиқ мулоқот тарзидаги самарали учрашувлардан мамнун бўлди.
Ўзбекистонга бўлган ташриф давомида, Швеция ва Финляндия ҳукумати аъзоларидан ташкил топган гуруҳ, ўзбек бозорининг ривожланиши, Ucell ходимлари билан суҳбат, ҳукумат ҳамда маҳаллий бизнес ҳамкорлар ва халқаро институтлар вакиллари билан учрашувларни юқори баҳолади.
Шунингдек, ташриф давомида сармоядорлар TeliaSonera вице-президенти ва Евросиё минтақаси раҳбари бошчилигида Ўзбекистон Республикаси Алоқа, ахборотлаштириш ва телекоммуникация технологиялари давлат қўмитасининг раиси — жаноб Хуршид Мирзоҳидов билан учрашишга муяссар бўлди. Учрашув давомида, телекоммуникация хизматларини тақдим этувчи мобил операторлар билан ўзаро ҳамкорлик, Ўзбекистонда IТ соҳасини ривожлантириш ҳамда TeliaSonera компанияси билан келажакда амалга ошириладиган режалар ҳақида сўз борди.
Ташриф буюрган вакиллар Ўзбекистонда жамият ва гуруҳ ривожи учун очиқ ҳамда барқарор бизнес юритишга ўз диққат-эътиборини қаратган Ucell компаниясининг фаолиятини юқори баҳолади. Компания Ўзбекистонда амалга оширилаётган бир қатор қонунлар, халқаро нормалар, TeliaSonera қабул қилган Ахлоқ кодексига, антикоррупция ички дастурида келтирилган қоидаларга амал қилишга ҳаракат қилмоқда.
TeliaSonera катта вице-президенти ва корпоратив коммуникациялар гуруҳи раҳбари Питер Борсос, Ўзбекистонга ташрифи доирасида қуйидагиларни таъкидлади: «Ташриф самарали ўтганидан мамнунман. Сармоядорларимизнинг фикрича, барқарорлик бўйича юзага келган масалаларни Ucell компанияси ҳал этиб келмоқда. Сармоядорлар гуруҳи аъзолари ташриф давомида олган тассуротларидан мамнун бўлди. Барқарор бизнес юритиш мавзуси доимий изланишларни талаб қилса-да, Ucell тўғри йўлни танлаганлиги муҳим аҳамиятга эга».
2014 йилнинг 15 сентябридан Ucell бош директори лавозимини эгаллайдиган Тону Грюнбергнинг таъкидлашича, сармоядорларнинг ташрифи айни муддао бўлиб, Ucell ҳар қачонгидан ҳам фаолроқ ривожланиши ҳамда янги иннавацион хизматларни тақдим этиш учун сармоя киритишни давом эттиради.
Изоҳ (0)