O‘zbekiston Respublikasi Prezidenti Islom Karimov 3-sentabr kuni “Toshkent davlat sharqshunoslik instituti tarkibida xitoyshunoslik fakultetini tashkil etish to‘g‘risida”gi qarorni imzoladi.
Hujjat zamonaviy pedagogik va axborot-kommunikatsiya texnologiyalaridan foydalangan holda ilg‘or o‘qitish uslublarini joriy etish asosida Xitoy tarixi, madaniyati, siyosati va iqtisodiyoti sohasida chuqur bilimlarga ega bo‘lgan va xitoy tilini biladigan yuqori malakali xitoyshunos mutaxassislarni tayyorlash maqsadida qabul qilindi.
Prezident Oliy va o‘rta maxsus ta’lim vazirligi, Iqtisodiyot vazirligi va Moliya vazirligining Toshkent davlat sharqshunoslik instituti tarkibida xitoyshunoslik fakultetini tashkil etish to‘g‘risidagi taklifini ma’qulladi.
Hujjatda keltirilishicha, Oliy va o‘rta maxsus ta’lim vazirligi, sharqshunoslik instituti rektorati 2014/2015-o‘quv yili uchun bakalavriatga qabul kvotalari hisobidan xitoy filologiyasi ta’lim yo‘nalishi bo‘yicha 34 talaba, jahon siyosati bo‘yicha 25 kishi hamda mamlakatlar iqtisodiyoti va mamlakatshunoslik yo‘nalishi bo‘yicha 25 talabadan iborat o‘quv guruhlarini shakllantiradi.
Oliy va o‘rta maxsus ta’lim vazirligiga Tashqi iqtisodiy aloqalar, investitsiyalar va savdo vazirligi, Tashqi ishlar vazirligi bilan birgalikda uch oy muddatda Toshkent davlat sharqshunoslik instituti bilan Xitoyning shu yo‘nalishdagi yetakchi universitetlari va institutlari o‘rtasida institutda ishlash hamda o‘qituvchilik qilish uchun taniqli mutaxassislar va xitoyshunos olimlarni jalb etish, institutning xitoyshunoslik fakulteti talabalari va o‘qituvchilarining stajirovkalarini tashkil qilish, birgalikdagi o‘quv va tadqiqot dasturlarini amalga oshirish maqsadida sheriklik aloqalarini yo‘lga qo‘yish, sharqshunoslik instituti huzuridagi Konfutsiy Instituti faoliyatini yanada rivojlantirish, shuningdek institut faoliyatini tashkil qilish uchun grantlarni jalb etish bo‘yicha kompleks chora-tadbirlarni ishlab chiqish va amalga oshirish vazifasi yuklatildi.
Izoh (0)