Andijon viloyatida aholini suv bilan ta’minlash sharoitlarini yaxshilashga qaratilgan keng ko‘lamdagi ishlar amalga oshirilmoqda, deya xabar berdi “Pravda Vostoka”.
“Hukumat aholi punktlarini ichimlik suvi bilan ta’minlashga 54 million dollarlik kreditlar ajratdi, — dedi “Andijonsuvoqava” MChJ markaziy nazorat-tahlil laboratoriyasi rahbari Rashid Kirichenko. — Kapital mablag‘ suv manbalarini rekonstruksiya qilish jarayonida resurslardan foydalanishning yangi, tejamkor usullarini, shuningdek suvni tozalash bo‘yicha innovatsion texnologiyalarni joriy etish imkonini berdi”.
Ichimlik suvi manbalarini yangilash uchun Osiyo Taraqqiyot va tiklanish banki ham “Andijonsuvoqava” MChJga 7,7 million dollarlik imtiyozli kredit taqdim etdi. Ushbu mablag‘ viloyat markazidagi uchta ko‘cha aholisini tizimli ravishda suv bilan ta’minlagan o‘n kilometrlik trassani to‘liq rekonstruksiya qilishga yo‘naltirildi.
Davlat tomonidan ajratilgan 54 million dollar kredit esa viloyat markazining Navoiy va O‘zbekiston prospektlaridagi suv trassalarini kapital yangilashga sarflandi.
Loyiha natijasida “Bog‘i shamol” bog‘ hududi va 20 ta mahallani suv bilan ta’minlash tizimi yaxshilandi. Shu bilan birga, loyiha doirasida Asaka shahri, Andijon va Oltinko‘l tumanlariga bir maromda suv yetkazib berish yo‘lga qo‘yildi.
Izoh (0)