Жанубий Корея пойтахти Сеул шаҳри мэри Пак Вон Сун Ўзбекистон давлат мустақиллигининг 23 йиллигига атаб Тошкентда Сеул боғи очилиши муносабати билан ўзбек халқига табрик йўллади. Бу ҳақда «Жаҳон» АА хабар берди.
«Ўзбекистон суверенитетга эга бўлганининг 23 йиллиги нишонланадиган кунда Тошкентда Сеул боғи очилаётгани қувонарлидир, — деди у. — Шу муносабат билан Сеул аҳолиси номидан Республика раҳбариятига боғни барпо этишда ҳар томонлама ҳамкорлик кўрсатгани учун миннатдорлик билдираман».
Пак Вон Сун Ўзбекистон пойтахтида яратилган боғ ҳар иккала давлатлар ўртасидаги дўстлик ва ҳамкорлик алоқаларини янада мустаҳкамлашига умид билдирди.
«Шунга аминманки, Сеул боғи шаҳарнинг энг диққатга сазовор жойларидан бирига айланади ва Ўзбекистонга сайёҳлар оқими кўпайишига ўз ҳиссасини қўшади», — дея ўз табригига якун ясади мэр.
Сеул боғи пойтахтдаги Бобур истироҳат боғи ҳудудида жойлашган бўлиб, унинг умумий майдони 17,5 гектарни, кўкаламзорлаштирилган ҳудуд 7 гектарни ташкил этади.
Корея томонидан молиялаштирилган Тошкентдаги «Сеул боғи»ни қуришдан асосий мақсад Жанубий Корея маданияти, анъаналари, миллий хусусиятларини тарғиб этишга, шунингдек, мамлакатлар ўртасида икки томонлама ҳамкорликни ривожлантиришга кўмаклашишдан иборат бўлди.
Таъкидлаш жоиз, Ислом Каримовнинг 2010 йил февраль ойида Жанубий Кореяга қилган ташрифи чоғида Тошкент ва Сеул шаҳарлари маъмуриятлари вакиллари ўртасида Тошкентдаги «Сеул боғи»ни қуриш бўйича келишув имзоланган эди.
Изоҳ (0)