AQShning Los-Anjeles (Kaliforniya shtati) shahrida 66-“Emmi” nufuzli televizion mukofotlarini topshirish marosimi bo‘lib o‘tdi, deya xabar bermoqda “ITAR-TASS”.
Marosimni amerikalik aktyor va qiziqchi Set Mayers olib bordi.
Eng ko‘p mukofotlarni Breaking Bad (“Tubanlashish”) seriali qo‘lga kiritdi. Eng yaxshi dramatik serial, eng yaxshi ssenariy yo‘nalishlarida mukofotlarni oldi. Shuningdek bosh rol ijrochisi Brayan Krenston eng yaxshi erkak aktyor deb tan olingan bo‘lsa, Aaron Pol va Anna Gan ikkinchi darajali erkak va ayol rollari uchun mukofotlarga ega bo‘ldi.
Modern Family (“Zamonaviy oila”) eng yaxshi komediyali serial sifatida beshinchi bora e’tirof etildi. Ushbu serialdagi ijrochilardan Tay Burrel eng yaxshi ikkinchi darajali komediya aktyori yo‘nalishi g‘olib bo‘ldi. Serial rejissori Geyl Mankuso esa eng yaxshi komediyali serial rejissori sifatida e’tirof etildi.
The Big Bang Theory (“Katta portlash nazariyasi”)dagi roli uchun Jim Parsons eng yaxshi komediya aktyori, Juliya Lui-Dreyfus esa Veep (“Vitse-prezident”) serialidagi roli uchun eng yaxshi komediya aktrisasi deb tan olindi.
Stiven Moffat Sherlock: His Last Vow (“Sherlok: Uning so‘nggi qasami”) seriyasi uchun “Eng yaxshi mini-serial, film yoki dramatik dastur ssenariysi” yo‘nalishida mukofotni qo‘lga kiritdi. Ushbu serialda Sherlok Xolms rolini ijro etgan Benedikt Kamberbetch esa eng yaxshi mini-serial aktyori sifatida mukofotga ega bo‘ldi.
Izoh (0)