Germaniya poytaxti Berlinda Young Euro Classic XV Xalqaro yoshlar musiqa festivali bo‘lib o‘tdi. Unda O‘zbekistonlik bastakor Aziza Sodiqova ishtirok etib, festival nufuzli sovrinini qo‘lga kiritdi. Bu haqda Europe.newsru.ua xabar berdi.
Berlinning amaldagi burgomistri Klaus Voverayt tomonidan ta’sis etilgan nufuzli sovrin o‘zbek bastakoriga uning Brief Scherben (“Maktub parchalari”) opusi uchun topshirildi.
Aziza Sodiqova 1978-yilda Toshkentda tug‘ilgan. U o‘zbekistonlik bastakor Tolibjon Sodiqovning nabirasi hamda dirijyor Oltin Sodiqovning qizidir.
Aziza 5 yoshidan pianino va bastakorlikni o‘rgana boshlagan. Hozirgi Uspenskiy nomidagi Respublika ixtisoslashtirilgan musiqa akademik litseyida, so‘ng O‘zbekiston davlat konservatoriyasida musiqa bo‘yicha chuqur ta’lim olgan. O‘zbekiston milliy universitetida filologlik bo‘yicha ham o‘qigan. Shuningdek Angliyadagi Birmingem konservatoriyasi va Londondagi Trinity Laban musiqa va raqs konservatoriyalarida bastakorlik bo‘yicha ta’lim olgan.
U bastalagan musiqalar O‘zbekistondan tashqari, Avstriya, Chexiya, Fransiya, Gruziya, Germaniya, Italiya, Rossiya, Buyuk Britaniya, AQSh va boshqa mamlakatlarda ijro etiladi.
Izoh (0)