Vin Dizel Ice Bucket Challenge (“Bir chelak muzdek suv sinovi”) dunyo xayriya onlayn-fleshmobida ishtirok etdi. Aktyor Rossiya prezidenti Vladimir Putin, AQSh birinchi xonimi Mishel Obama va aktrisa Anjelina Joliga chaqiriq yo‘lladi.
Vin Dizelning chaqirig‘i muhrlangan videolavha uning Instagram-akkauntiga joylandi.
Ta’kidlash joiz, unda Vin Dizel sovuq suvni ustidan quymagan, shunchaki muz bo‘laklarini boshidan sochib yuborgan.
Eslatib o‘tamiz, ushbu aksiyaga ko‘ra mashhur insonlar o‘z ustidan muzdek suv quyib, do‘stlariga shunday qilishni yoki xayriya jamg‘armasiga pul o‘tkazishni taklif qilishi lozim. Hozirga qadar Facebook asoschisi Mark Sukerberg, Microsoft asoschisi Bill Geyts hamda Apple kompaniyasining rahbari Tim Kuk, futbolchilardan Ronaldu va Dani Alvesning tadbir ishtirokchilariga aylanganini ma’lum qilgan edik.
Xayriyadan tushadigan mablag‘ amiotrofik skleroz — Lu Gerig kasalligiga chalinganlarga sarflanadi. Bu kasallik odamning bosh miya tizimiga ta’sir qilib, keyinchalik falajlikka olib kelishi mumkin.
Vin Dizel estafetaning davlat rahbarini sovuq suvda cho‘milishga da’vat etgan birinchi ishtirokchisi emas. Avvalroq Jastin Biber vazifani bajarib, Barak Obamaga chaqiriq yo‘llagan edi, biroq AQSh prezidenti unga javob berganicha yo‘q.
Izoh (0)