АҚШнинг Лос-Анжелес (Калифорния штати) шаҳрида 66-«Эмми» нуфузли телевизион мукофотларини топшириш маросими бўлиб ўтди, дея хабар бермоқда ИТАР-ТАСС.
Маросимни америкалик актёр ва қизиқчи Сет Майерс олиб борди.
Энг кўп мукофотларни Breaking Bad («Тубанлашиш») сериали қўлга киритди. Энг яхши драматик сериал, энг яхши сценарий йўналишларида мукофотларни олди. Шунингдек бош рол ижрочиси Брайан Крэнстон энг яхши эркак актёр деб тан олинган бўлса, Аарон Пол ва Анна Ган иккинчи даражали эркак ва аёл роллари учун мукофотларга эга бўлди.
Modern Family («Замонавий оила») энг яхши комедияли сериал сифатида бешинчи бора эътироф этилди. Ушбу сериалдаги ижрочилардан Тай Буррел энг яхши иккинчи даражали комедия актёри йўналиши ғолиб бўлди. Сериал режиссёри Гейл Манкусо эса энг яхши комедияли сериал режиссёри сифатида эътироф этилди.
The Big Bang Theory («Катта портлаш назарияси»)даги роли учун Жим Парсонс энг яхши комедия актёри, Жулия Луи-Дрейфус эса Veep («Вице-президент») сериалидаги роли учун энг яхши комедия актрисаси деб тан олинди.
Стивен Моффат Sherlock: His Last Vow («Шерлок: Унинг сўнгги қасами») серияси учун «Энг яхши мини-сериал, фильм ёки драматик дастур сценарийси» йўналишида мукофотни қўлга киритди. Ушбу сериалда Шерлок Холмс ролини ижро этган Бенедикт Камбербэтч эса энг яхши мини-сериал актёри сифатида мукофотга эга бўлди.
Изоҳ (0)