AQShning Dallas (Texas) shahridan San-Diyego (Kaliforniya) shahriga yo‘l olgan yo‘lovchi samolyoti favqulodda qo‘ndi. Tvitter ijtimoiy tarmog‘ida ushbu samolyotga bomba qo‘yilgani haqida xabar paydo bo‘lgach, Federal qidiruv byurosidan bunday talab kelib tushgan. Bu haqda CBS News xabar berdi.
Hodisa 24-avgust, yakshanba kuni American Airlines aviakompaniyasining “Boing-757” samolyoti bortida sodir bo‘lgan. Ushbu reys bilan uchayotgan Sony Online Entertainment kompaniyasi prezidenti Jon Smedlining Tvitterdagi akkauntidan xakerlar tomonidan yuborilgan bomba haqidagi ogohlantirish aviakompaniyaga kelib tushgach, FQB samolyotni Arizona shtatidagi Finiks aeroportiga zudlik bilan qo‘ndirish haqida qaror qabul qilgan.
Samolyot eson-omon qo‘nib olgach, uning bortidan barcha yo‘lovchi va ekipaj a’zolari evakuatsiya qilindi, shundan so‘ng layner va yuklar politsiyachilar tomonidan tekshirib chiqildi. Ko‘rikdan so‘ng “Boing” San-Diyegoga parvozini davom ettirdi.
Bortda bomba topilgan-topilmagani haqida hech qanday xabar berilmadi. Smedlining Tvitter-akkauntini buzganlik bo‘yicha javobgarlikni Lizard Squad nomi ostida mashhur bo‘lgan xakerlar guruhi o‘z bo‘yniga oldi. Bu guruh avvalroq Sony PlayStation Network’ni buzishga aloqadorligini ham tan olgan edi.
Izoh (0)