Liviya qirg‘oqlarida kema halokatga uchrashi natijasida 170 nolegal muhojirlar nobud bo‘lgan yoki izsiz yo‘qolgan deb e’lon qilindi. “ITAR-TASS”ning arab OAVlariga asoslanib xabar berishicha, yog‘ochdan yasalgan qo‘lbola kema 22-avgust, juma kuni O‘rta Yer dengizida Tripolidan 60 kilometr uzoqlikda cho‘kib ketgan.
Butun kun bo‘yi tirik qolganlarni qidirish davom etdi. 16 kishi qutqarildi, shuningdek, 15 kishining jasadi suvdan chiqarib olindi. Liviya qirg‘oq soqchiligi ma’lumotlariga ko‘ra, kemada Yevropaga baxt izlab otlangan Qora qit’a fuqarolaridan iborat 200 kishi bo‘lgan bo‘lishi mumkin.
Nashrning yozishicha, bortida nolegal muhojirlar bo‘lgan kemalar halokatga uchrashi bilan bog‘liq hodisalar O‘rta Yer dengizida deyarli har oyda sodir bo‘lib turadi. Muammar Qaddafiy hukmronligi davrida Liviya Afrika davlatlari fuqarolarining Yevropaga o‘tishida ishonchli to‘siq bo‘lib xizmat qilgan bo‘lsa, ayni paytda nolegallar oqimiga qarshi samarali choralar qo‘llanilmaydi.
Ko‘pincha ular yollagan suzish vositasi shunchalik to‘lib ketadiki, natijada yukni ko‘tara olmay cho‘kib ketadi. Halokatdan hamma ham tirik chiqmaydi. Nolegallarga ozodlik uchun “baxtli chipta” bir necha ming dollarga tushadi, bu esa ko‘pchilik uchun imkoniyatdan tashqaridagi mablag‘dir.
Izoh (0)