24-avgust, yakshanba kuni AQShning Kaliforniya shtati shimolida 6 magnitudali zilzila sodir bo‘ldi. Natijada 172 kishiga ziyon yetdi, deya xabar berdi “ITAR-TASS” zilzila epitsentri yaqinidagi Napa shahri kasalxonasi ma’lumotiga tayanib.
Jabrlanganlarning deyarli barchasi, yordam ko‘rsatilgach, shifoxonadan chiqarilgan. Zarar ko‘rganlar ichida sinish, nafas va yurak bilan bog‘liq muammolar qayd etilgan. Qolganlar esa asosan, kesilish natijasida hosil bo‘lgan yara va lat yeyishlardan shikoyat qilgan. Bir kishining ahvoli jiddiy deb baholanmoqda, tibbiy muassasadagi qolgan 12 kishining hayoti xavf ostida emas.
Olingan xabarlarga ko‘ra, 115 ta binoga zarar yetgan, ular foydalanish uchun yaroqsiz holga kelgan. Ayni paytda Napaning 7,3 ming aholisi chiroqsiz qolgan, yana 30 ming kishining uyiga elektr quvvati uzilishlar bilan yetkazilmoqda. Shtatda favqulodda holat rejimi amal qilmoqda.
Yer silkinishi 24-avgust, yakshanba kuni mahalliy vaqt bilan 03:20 (Toshkent vaqti bilan 15:20)da kuzatildi. Zilzila epitsentri Napadan 9 kilometr janubi-g‘arbda joylashdi.
Izoh (0)