Facebook’dagi “Общественный контроль”(“Jamoatchilik nazorati”) guruhida turar joylar yaqinida qoramollarni boqayotgan shaxslarning bunday xatti-harakatlari qonunga nechog‘li to‘g‘ri kelishi haqida bahs yuzaga kelgach, Uz24.uz bu borada O‘zbekiston Respublikasi Tabiatni muhofaza qilish davlat qo‘mitasiga murojaat qildi va tegishli javob oldi.
Xatda aytilishicha, Vazirlar Mahkamasining “Biologik resurslardan oqilona foydalanish va ularni O‘zbekiston Respublikasi hududidan olib chiqish ustidan nazoratni kuchaytirish to‘g‘risida”gi qaroriga muvofiq, belgilangan yaylovzorlarda qoramolni yoyish uchun mahalliy hukumat organlari ruxsat berishi kerak. Turar joylardan iborat tinch tumanlarda esa qoramol o‘tlatish taqiqlanadi.
Shaharlarda chorva yoyish hollari kuzatilsa, hayvonlar egalari ma’muriy javobgarlikka tortiladi.
Javob xatida shuningdek, Vazirlar Mahkamasining “O‘zbekiston Respublikasi o‘simlik dunyosiga yetkazilgan zarar uchun undiriladigan pul miqdorini hisoblash uchun qat’iy belgilangan narxlarni tasdiqlash to‘g‘risida”gi qaroriga muvofiq, qoramolni noqonuniy ravishda o‘tlatish natijasida o‘simlik dunyosiga keltirilgan zarar uchun qoramol yoshidan kelib chiqib, uning har boshiga eng kam oylik ish haqining 0,3 dan 0,7 gacha koeffitsiyentida pul undirilishi qayd etilgan.
Izoh (0)