Xitoy milliy neft-gaz korporatsiyasi (China National Petrolium Corp., CNPC) va “O‘zbekneftgaz” MXK O‘zbekiston hududida Xitoy—Markaziy Osiyo gaz quvurining D tarmog‘ini qurish va ishlatish uchun qo‘shma korxona tashkil qiladi. Bu haqda UzDaily xabar berdi.
Tarmoq ishga tushirilgach, Xitoy—Markaziy Osiyo gaz quvuri orqali Markaziy Osiyodan Xitoyga yetkazib beriladigan tabiiy gaz hajmi yiliga 85 milliard kubometrga yetadi, natijada ushbu gaz quvuri mintaqadagi eng yirik gaz o‘tkazish tizimiga aylanadi.
CNPC va “O‘zbekneftgaz” MXK Muborakdagi gazni qayta ishlash zavodi asosida yangi kimyo-gaz zavodini qurishni ham rejalashtirmoqda. Yangi zavod Markaziy Osiyo bozoriga mo‘ljallangan polietilen va suyultirilgan gaz ishlab chiqaradi.
Qo‘shma korxona tashkil etish haqida kelishuv va Muborakda gaz-kimyo zavodini qurish haqidagi memorandum CNPC boshqaruvi raisi Chjou Szipin va “O‘zbekneftgaz” MXK boshqaruvi raisi Shokir Fayzullayev tomonidan 19-avgust, seshanba kuni Pekinda O‘zbekiston prezidenti Islom Karimovning Xitoyga tashrifi doirasida imzolandi.
Izoh (0)