Ўзбекистон шаҳарларининг аҳоли яшайдиган туманларида қорамол ўтлатиш тақиқланади

Facebook’даги «Общественный контроль»(«Жамоатчилик назорати») гуруҳида турар жойлар яқинида қорамолларни боқаётган шахсларнинг бундай хатти-ҳаракатлари қонунга нечоғли тўғри келиши ҳақида баҳс юзага келгач, Uz24.uz бу борада Ўзбекистон Республикаси Табиатни муҳофаза қилиш давлат қўмитасига мурожаат қилди ва тегишли жавоб олди.

Хатда айтилишича, Вазирлар Маҳкамасининг «Биологик ресурслардан оқилона фойдаланиш ва уларни Ўзбекистон Республикаси ҳудудидан олиб чиқиш устидан назоратни кучайтириш тўғрисида»ги қарорига мувофиқ, белгиланган яйловзорларда қорамолни ёйиш учун маҳаллий ҳукумат органлари рухсат бериши керак. Турар жойлардан иборат тинч туманларда эса қорамол ўтлатиш тақиқланади.

Шаҳарларда чорва ёйиш ҳоллари кузатилса, ҳайвонлар эгалари маъмурий жавобгарликка тортилади.

Жавоб хатида шунингдек, Вазирлар Маҳкамасининг «Ўзбекистон Республикаси ўсимлик дунёсига етказилган зарар учун ундириладиган пул миқдорини ҳисоблаш учун қатъий белгиланган нархларни тасдиқлаш тўғрисида»ги қарорига мувофиқ, қорамолни ноқонуний равишда ўтлатиш натижасида ўсимлик дунёсига келтирилган зарар учун қорамол ёшидан келиб чиқиб, унинг ҳар бошига энг кам ойлик иш ҳақининг 0,3 дан 0,7 гача коэффициентида пул ундирилиши қайд этилган.