Amerikalik aktrisa Sandra Bullok so‘nggi yilda 51 million dollar ishlab, Gollivudning eng ko‘p daromad oladigan aktrisasiga aylandi. Bu haqda Forbes jurnali ma’lum qildi.
Bullok uchun asosiy daromad manbasi rejissor Alfonso Kuaronning o‘tgan yili ekranlarga chiqqan “Gravitatsiya” filmi bo‘ldi. U prokatda 716 million dollar to‘pladi va 2014-yilgi Oskar taqdimotida yettita yo‘nalish bo‘yicha mukofotga ega bo‘ldi.
2013-yilning iyunidan 2014-yilning iyunigacha eng ko‘p mablag‘ ishlagan aktrisalar reytingidan Jennifer Lourens (34 million dollar), Jennifer Eniston (31 million dollar), Gvinet Peltrou (19 million dollar), Anjelina Joli va Kemeron Diaz (18 million dollardan), Skarlett Yoxansson (17 million dollar), Emi Adams va Natali Portman (13 million dollardan) hamda Kristen Styuart (12 million dollar) ham o‘rin oldi.
O‘tgan yilgi reytingda Anjelina Joli 33 million dollarlik daromad bilan yetakchilik qilgan edi.
Jurnalning ta’kidlashicha, Gollivudda hali-hamon ayollar erkaklarga qaraganda kamroq pul topadi. O‘tgan yilning eng serdaromad aktyori kichik Robert Dauni 75 million dollar ishlab topgan.
Izoh (0)