AQSh maxsus xizmatlari avtomatik rejimda, inson nazoratisiz, kiberhujumlarni aniqlash va ularga javob zarbasini berishga qodir kompyuter dasturini ishlab chiqmoqda. Bu haqda Amerika maxsus xizmatlari sobiq xodimi Edvard Snouden Wired jurnaliga bergan intervyusida aytib o‘tdi, deb yozadi “ITAR-TASS”.
Snoudenning aytishicha, dastur MonsterMind (“Maxluq idroki”) deb nom olgan bo‘lib, javob zarbalarini berish xususiyati uni boshqa dasturlardan ajratib turadi. Snouden ta’kidlaganidek, nazoratsiz ishlash imkoniyati uni xavfli vositaga aylantiradi, chunki bunda aybsizlar ham zarar ko‘rishi mumkin.
Edvard Snouden MonsterMind’ning kishilar shaxsiy hayotiga aralashish xavfini ham yaratishini aytdi. Ushbu dastur ishlashi uchun AQSh Milliy xavfsizlik agentligi (MXA) AQSh fuqarolarining mamlakatdan tashqaridagi barcha aloqa kanallari ustidan maxfiy kuzatuv imkonini qo‘lga kiritishi kerak bo‘ladi.
“Ta’kidlanishicha, zararli axborot oqimlarini aniqlash va ularga javob berish uchun ma’lumotlar oqimi tahlil qilinishi kerak, — dedi Snouden. — Ularni tahlil qilish — ordersiz shaxsiy suhbatlarni tinglash bilan AQSh konstitutsiyasidagi (o‘zboshimcha tintuv va hibsni taqiqlovchi) to‘rtinchi tuzatish buziladi.
Snouden bilan intervyu Moskvada bo‘lib o‘tdi. Wired muxbiri maxsus xizmatlar sobiq xodimi bilan suhbatga uch sutka sarfladi. MXA vakillari Snouden bayonotiga nisbatan izoh bildirishdan bosh tortdi.
Izoh (0)