KHAY/Bodomzor yo‘li chorrahasida bir soat: 85 ta qo‘pol qoidabuzarlik

“Gazeta.uz”, “Daryo” va “Kun” internet-nashrlari O‘zbekistondagi yo‘l harakati xavfsizligi sohasidagi vaziyatni yaxshilashga qaratilgan “Radar.uz” qo‘shma axborot loyihasini boshlamoqda.

Mamlakat yo‘llaridagi xavfsizlik masalasi nafaqat o‘z dolzarbligini yo‘qotmayapti, balki kundan-kunga jiddiylashmoqda. Yo‘l harakati qoidalarining ommaviy ravishda buzilishi shu qadar oddiy holga aylanib qoldiki, endilikda hech kim bunga e’tibor ham qaratmayapti.

Vaziyatni yaxshi tomonga o‘zgartirish vaqti keldi

“Radar.uz” – bu nima? Bu notijoriy va barcha qiziquvchilar uchun ochiq loyiha bo‘lib, yaqqol misollar bilan yo‘l harakati xavfsizligi sohasidagi ahvol achinarli ekanligini manfaatdor tomonlar va jamoatchilikka bildirish va ko‘tarilgan muammolarning ehtimoliy yechimlarini taklif etishni maqsad qilgan.

Umid qilamizki, birgalikdagi harakatlar, jamoatchilik va hokimiyat organlarining ko‘magi bilan mamlakat yo‘llaridagi harakat xavfsizligini oshirishga hissa qo‘sha olamiz.

Bir soatda yo‘l harakati qoidalarining 85 marta qo‘pol ravishda buzilishi

Birinchi aksiyamiz doirasida Kichik halqa avtomobil yo‘li va Bodomzor yo‘li ko‘chalari chorrahasi monitoring qilindi. Bir soat davomida “Radar.uz” volontyorlari yo‘l harakati qoidalari 85 marta qo‘pol ravishda buzilganini qayd etishdi.

Monitoring 4-avgust, dushanba kuni soat 18:00 dan 19:00 ga qadar qayd etilgan chorrahaning faqat bir qismida – sobiq “Osh markazi” yaqinidagi svetofor oldida o‘tkazilgan bo‘lib, ushbu muddat oralig‘idagi quyidagicha qoidabuzarliklar aniqlangan:

1. Haydovchilarning yo‘lning qarama-qarshi harakat yo‘nalishi uchun mo‘ljallangan tomoniga o‘tishi — 65 ta holat;
2. Svetoforning taqiqlovchi qizil chirog‘iga to‘xtatmasdan o‘tib ketish — 17 ta holat;
3. Qarama-qarshi harakat yo‘nalishi uchun mo‘ljallangan yo‘l bo‘lagiga chiqqan holatda svetoforning taqiqlovchi qizil chirog‘iga to‘xtamasdan o‘tib ketish — 12 ta holat;
4. Piyodani o‘tkazib yubormasdan o‘ngga burilish — 3 ta holat.

Agar yo‘l harakati qoidalarini buzganlar uchun aniq ishlaydigan mexanizm bo‘lganida edi, ushbu holatda davlat g‘aznasiga 65 879 979 so‘m jarima ko‘rinishida tushgan bo‘lardi.

Eslatib o‘tamiz, ushbu o‘rganish Toshkentdagi yuzlab chorrahalardan birining faqat bir qismida bor-yo‘g‘i bir soat davomida o‘tkazilgan. Yo‘l harakati qoidalarining bu qadar keng miqyosda buzilishi avtohavaskorlar va piyodalar hayotiga qanchalik xavf solishi haqida gapirishdan esa ma’no yo‘q.

Ehtimoliy yechim

Eng ko‘p uchragan – qarama-qarshi harakat yo‘nalishiga chiqish bilan bog‘liq qoidabuzarlikning ehtimoliy yechimi sifatida (ko‘rsatilgan joyda vaziyatni izchil o‘rganish va kerakli hisob-kitoblarni olib borish natijasida) ushbu chorrahaga ajratuvchi to‘siq o‘rnatishni taklif qilish mumkin. Yilning barcha fasllarida aniq ko‘rinadigan yo‘l chiziqlarning bo‘lishi, qo‘shimcha yo‘l belgilarini o‘rnatish va barcha svetoforlarning soz holatda bo‘lishi ham katta ahamiyatga ega.

Ushbu chorraha bo‘yicha takliflar IIV YHXBBga jo‘natiladi.