“Rossiya — Koreya 2014” xalqaro avtopoygasiga o‘zbekistonliklardan iborat Captiva qo‘shildi

“Rossiya — Koreya 2014” xalqaro avtopoygasiga o‘zbekistonlik koreyslar Captiva avtomobili bilan qo‘shildi, deya xabar bermoqda Mytashkent.uz.

Ma’lum bo‘lishicha, Captiva’ni Kaleon kompaniyasi asoschisi Kvak Vasiliy Leonidovich Koreya madaniyat markazi uchun sotib olgan.

Eslatib o‘tamiz, 7-iyulda boshlangan “Rossiya — Koreya 2014” xalqaro avtomobil poygasi  ishtirokchilari 13-iyul kechqurun Toshkentga kirib keldi. Poyga ishtirokchilari ikki kun — 14—15-iyulda Toshkentda harakatlanib, 16-iyul kuni yo‘nalishdagi keyingi nuqta tomon yo‘l oladi.

“Rossiya — Koreya 2014” avtomobil poygasi koreyaliklarning o‘z ixtiyori bilan Rossiyaga ko‘chganining 150 yilligi hamda Rossiya va Koreya o‘rtasida diplomatik aloqalar o‘rnatilganiga 130 yil to‘lgani munosabati bilan tashkil etildi.

Poyga qatnashchilari bir yarim oy mobaynida Moskva — Toshkent — Olma-Ota — Novosibirsk — Vladivostok — Pxenyan — Seul yo‘nalishida harakatlanadi. “Rossiya — Koreya 2014” xalqaro avtomobil poygasi 25-avgustda o‘z nihoyasiga yetadi.