Qozog‘istondagi “Aziya Avto” AJ avtomobil zavodi rahbari Yerik Sagimboyevning fikricha, Qozog‘iston avto ishlab chiqaruvchilari o‘z mahsulotlarini muvaffaqiyatli eksport qilishi uchun tashqi savdodagi sheriklar, jumladan O‘zbekiston bilan munosabatlarni “tenglashtirishi” kerak. Bu haqda Tengrinews.kz xabar berdi.
Uning aytishicha, 90-yillardan boshlab Qozog‘iston o‘zbek avtosanoati uchun asosiy bozor bo‘lib kelgan. UzDaewoo avtomobillari mamlakat bozoriga bojsiz kiritilgan, shu sababli import hajmi bo‘yicha avtomobil markalari ichida yuqori uchlikka kirgan.
Ta’kidlash joiz, 2014-yil boshida Qozog‘iston “Avtotransport vositalari xavfsizligiga talablar” texnik reglamentiga kiritilgan talablarga ko‘ra, o‘zbek mashinalari Qozog‘iston bozoriga kirishi cheklangan edi. “Biroq bir necha oy o‘tib, O‘zbekiston ushbu yangi talablarni bekor qildi, — dedi Sagimboyev. — Bir oydan kam vaqt ichida Qozog‘istonga 20 mingta avtomobil keltirildi. Taqqoslash uchun, o‘tgan yil mobaynida jami 13,3 mingta o‘zbek mashinasi bizga eksport qilingan edi”.
Sagimboyevning so‘zlariga ko‘ra, ular o‘zbek avtomobil sanoatini rivojlantirishga yordam bermoqda. “Tashqi savdoda adolat o‘rnatilishi kerak. Qozog‘istonga ham O‘zbekiston bozoriga bojsiz mahsulotlarni tengma-teng olib kirish imkoni berilishi kerak. Yoki o‘zbek mashinalariga ham bojxona tarif va aksizlari joriy etilishi kerak”, — dedi u.
Qncepto konsalting kompaniyasi direktori Oleg Alfyorovning aniqlik kiritishicha, Qozog‘iston avto ishlab chiqaruvchilariga o‘zbek mashinalari bilan bir qatorda, Ukrainadan keltirilayotgan transport vositalari ham zarar yetkazmoqda. Bojxona ittifoqi ishlay boshlaganidan buyon o‘zbek va ukrain avtosanoati Qozog‘istonga 33 mingta avtomobil keltirgan.
“Bu o‘tgan yili Qozog‘iston avtomobil ishlab chiqaruvchilari sotgan umumiy avtomobillar soniga teng”, — dedi Alfyorov.
Izoh (0)