«Gazeta.uz», «Дарё» ва «Кун» интернет-нашрлари Ўзбекистондаги йўл ҳаракати хавфсизлиги соҳасидаги вазиятни яхшилашга қаратилган «Radar.uz» қўшма ахборот лойиҳасини бошламоқда.
Мамлакат йўлларидаги хавфсизлик масаласи нафақат ўз долзарблигини йўқотмаяпти, балки кундан-кунга жиддийлашмоқда. Йўл ҳаракати қоидаларининг оммавий равишда бузилиши шу қадар оддий ҳолга айланиб қолдики, эндиликда ҳеч ким бунга эътибор ҳам қаратмаяпти.
Вазиятни яхши томонга ўзгартириш вақти келди
«Radar.uz» – бу нима? Бу нотижорий ва барча қизиқувчилар учун очиқ лойиҳа бўлиб, яққол мисоллар билан йўл ҳаракати хавфсизлиги соҳасидаги аҳвол ачинарли эканлигини манфаатдор томонлар ва жамоатчиликка билдириш ва кўтарилган муаммоларнинг эҳтимолий ечимларини таклиф этишни мақсад қилган.Умид қиламизки, биргаликдаги ҳаракатлар, жамоатчилик ва ҳокимият органларининг кўмаги билан мамлакат йўлларидаги ҳаракат хавфсизлигини оширишга ҳисса қўша оламиз.
Бир соатда йўл ҳаракати қоидаларининг 85 марта қўпол равишда бузилиши
Биринчи акциямиз доирасида Кичик ҳалқа автомобиль йўли ва Бодомзор йўли кўчалари чорраҳаси мониторинг қилинди. Бир соат давомида «Radar.uz» волонтёрлари йўл ҳаракати қоидалари 85 марта қўпол равишда бузилганини қайд этишди.
Мониторинг 4 август, душанба куни соат 18:00 дан 19:00 га қадар қайд этилган чорраҳанинг фақат бир қисмида – собиқ «Ош маркази» яқинидаги светофор олдида ўтказилган бўлиб, ушбу муддат оралиғидаги қуйидагича қоидабузарликлар аниқланган:
- Ҳайдовчиларнинг йўлнинг қарама-қарши ҳаракат йўналиши учун мўлжалланган томонига ўтиши — 65 та ҳолат;
- Светофорнинг тақиқловчи қизил чироғига тўхтатмасдан ўтиб кетиш — 17 та ҳолат;
- Қарама-қарши ҳаракат йўналиши учун мўлжалланган йўл бўлагига чиққан ҳолатда светофорнинг тақиқловчи қизил чироғига тўхтамасдан ўтиб кетиш — 12 та ҳолат;
- Пиёдани ўтказиб юбормасдан ўнгга бурилиш — 3 та ҳолат.
Эслатиб ўтамиз, ушбу ўрганиш Тошкентдаги юзлаб чорраҳалардан бирининг фақат бир қисмида бор-йўғи бир соат давомида ўтказилган. Йўл ҳаракати қоидаларининг бу қадар кенг миқёсда бузилиши автоҳаваскорлар ва пиёдалар ҳаётига қанчалик хавф солиши ҳақида гапиришдан эса маъно йўқ.
Эҳтимолий ечим
Энг кўп учраган – қарама-қарши ҳаракат йўналишига чиқиш билан боғлиқ қоидабузарликнинг эҳтимолий ечими сифатида (кўрсатилган жойда вазиятни изчил ўрганиш ва керакли ҳисоб-китобларни олиб бориш натижасида) ушбу чорраҳага ажратувчи тўсиқ ўрнатишни таклиф қилиш мумкин. Йилнинг барча фаслларида аниқ кўринадиган йўл чизиқларнинг бўлиши, қўшимча йўл белгиларини ўрнатиш ва барча светофорларнинг соз ҳолатда бўлиши ҳам катта аҳамиятга эга.Ушбу чорраҳа бўйича таклифлар ИИВ ЙҲХББга жўнатилади.
Изоҳ (0)