Xitoyning CNTIC (savdo-iqtisodiy hamkorlik bo‘yicha Xitoy korporatsiyasi) korporatsiyasi “O‘zbekiston temir yo‘llari” davlat aksiyadorlik temir yo‘l kompaniyasi bilan shartnoma imzoladi. Unga ko‘ra, CNTIC Qarshi—Termiz temir yo‘lini elektrlashtirish uchun 50 million dollarlik uskunalar yetkazib beradi. Bu haqda O‘zbekiston kompaniyasidagi manbasiga tayanib, “RIA Novosti” xabar berdi.
2013-yil so‘ngida e’lon qilingan tender bo‘yicha CNTIC tashqi energiya ta’minoti, aloqa tarmoqlarida xizmat qilish uchun mo‘ljallangan mashinalar va temir yo‘l strelkalarini surish moslamalarini yetkazib beradi.
Yil davomida CNTIC “O‘zbekiston temir yo‘llari” bilan Maroqand—Qarshi yo‘lini elektrlashtirish uchun yana 45,6 million dollarga teng uskunalarni yetkazib berish to‘g‘risidagi shartnomani imzoladi.
2020-yilgacha “O‘zbekiston temir yo‘llari” DATYK tizimidagi 780 kilometrlik temir yo‘l elektrlashtiriladi. Unga xorijiy investitsiyalarni jalb qilish orqali va o‘z mablag‘i hisobidan 2,8 milliard AQSh dollari sarflanishi ko‘zda tutilgan. Kompaniya birinchi navbatda Maroqand—Qarshi (140 km), Qarshi—Termiz (325 km) yo‘nalishlarini elektrlashtirishini ma’lum qildi. Shuningdek, ikki yo‘lakli Jizzax—Yangiyer elektrlashtirilgan yo‘li (187 km) va Angren—Pop liniyasini (129 km) qurish ham rejalashtirilgan.
Ta’kidlash joiz, 2010-yilda 114 kilometrlik Toshkent—Angren temir yo‘li elektrlashtirilishi yakunlandi. Unga 85,4 million dollar mablag‘ sarflanib, natijada tashish xarajatlari 1,8 marta qisqardi.
“O‘zbekiston temir yo‘llari” ma’lumotlariga ko‘ra, ayni paytda O‘zbekistonda elektrlashtirilgan yo‘llar (1,7 ming km) jami temir yo‘l uzunligining (4,3 ming km) 27 foizini tashkil qiladi.
Izoh (0)