Хитойнинг CNTIC (савдо-иқтисодий ҳамкорлик бўйича Хитой корпорацияси) корпорацияси «Ўзбекистон темир йўллари» давлат акциядорлик темир йўл компанияси билан шартнома имзолади. Унга кўра, CNTIC Қарши—Термиз темир йўлини электрлаштириш учун 50 миллион долларлик ускуналар етказиб беради. Бу ҳақда Ўзбекистон компаниясидаги манбасига таяниб, «РИА Новости» хабар берди.
2013 йил сўнгида эълон қилинган тендер бўйича CNTIC ташқи энергия таъминоти, алоқа тармоқларида хизмат қилиш учун мўлжалланган машиналар ва темир йўл стрелкаларини суриш мосламаларини етказиб беради.
Йил давомида CNTIC «Ўзбекистон темир йўллари» билан Мароқанд—Қарши йўлини электрлаштириш учун яна 45,6 миллион долларга тенг ускуналарни етказиб бериш тўғрисидаги шартномани имзолади.
2020 йилгача «Ўзбекистон темир йўллари» ДАТЙК тизимидаги 780 километрлик темир йўл электрлаштирилади. Унга хорижий инвестицияларни жалб қилиш орқали ва ўз маблағи ҳисобидан 2,8 миллиард АҚШ доллари сарфланиши кўзда тутилган. Компания биринчи навбатда Мароқанд—Қарши (140 км), Қарши—Термиз (325 км) йўналишларини электрлаштиришини маълум қилди. Шунингдек, икки йўлакли Жиззах—Янгиер электрлаштирилган йўли (187 км) ва Ангрен—Поп линиясини (129 км) қуриш ҳам режалаштирилган.
Таъкидлаш жоиз, 2010 йилда 114 километрлик Тошкент—Ангрен темир йўли электрлаштирилиши якунланди. Унга 85,4 миллион доллар маблағ сарфланиб, натижада ташиш харажатлари 1,8 марта қисқарди.
«Ўзбекистон темир йўллари» маълумотларига кўра, айни пайтда Ўзбекистонда электрлаштирилган йўллар (1,7 минг км) жами темир йўл узунлигининг (4,3 минг км) 27 фоизини ташкил қилади.
Изоҳ (0)