Argentina hukumati Amerika fondlari bilan mamlakat qarzdorligini restrukturizatsiya qilish — qarzdorlik shartlarini qayta ko‘rib chiqish borasida kelishuvga erisha olmadi, bu Argentinada deyarli defolt holati yuzaga kelganini bildiradi.
Interfax xabar berishicha, muzokaralardan so‘ng mamlakat iqtisodiyot vaziri Aksel Kiselyof argentinaliklar kelajagini xavf ostiga qo‘ymaslik maqsadida hukumat “yirtqich fondlar” bilan bitim imzolamasligini aytdi.
Standard and Poor’s reyting agentligi Argentina obligatsiyalariga “qisman defolt” reytingini berdi.
Qarzlari to‘lanishini talab qilayotgan Elliot Capital Management va Aurelius Capital Management fondlari muzokaralar yakunlari bo‘yicha izoh berganicha yo‘q.
Nashrning eslatishicha, defolt holati Argentinada 2001-yilda ham kuzatilgan. O‘shanda mamlakat hukumati 95 milliard dollar miqdoridagi qarzini to‘lay olmagan.
Ma’lumot o‘rnida: Defolt — qarz oluvchining qarz olish haqidagi kelishuv shartlarini buzishi, qarz majburiyatlari bo‘yicha to‘lovlarni va boshqa shartlarni bajara olmasligi.
Izoh (0)