Аргентина ҳукумати Америка фондлари билан мамлакат қарздорлигини реструктуризация қилиш — қарздорлик шартларини қайта кўриб чиқиш борасида келишувга эриша олмади, бу Аргентинада деярли дефолт ҳолати юзага келганини билдиради.
Interfax хабар беришича, музокаралардан сўнг мамлакат иқтисодиёт вазири Аксель Кисельоф аргентиналиклар келажагини хавф остига қўймаслик мақсадида ҳукумат «йиртқич фондлар» билан битим имзоламаслигини айтди.
Standard and Poor’s рейтинг агентлиги Аргентина облигацияларига «қисман дефолт» рейтингини берди.
Қарзлари тўланишини талаб қилаётган Elliot Capital Management ва Aurelius Capital Management фондлари музокаралар якунлари бўйича изоҳ берганича йўқ.
Нашрнинг эслатишича, дефолт ҳолати Аргентинада 2001 йилда ҳам кузатилган. Ўшанда мамлакат ҳукумати 95 миллиард доллар миқдоридаги қарзини тўлай олмаган.
Маълумот ўрнида: Дефолт — қарз олувчининг қарз олиш ҳақидаги келишув шартларини бузиши, қарз мажбуриятлари бўйича тўловларни ва бошқа шартларни бажара олмаслиги.
Изоҳ (0)