O‘zbekiston Respublikasi Vazirlar Mahkamasining 2014-yil 11-iyuldagi qarori bilan 2014—2015-yillarda Qoraqalpog‘iston Respublikasi, Buxoro, Jizzax, Qashqadaryo, Namangan, Samarqand, Surxondaryo va Xorazm viloyatlarida zarar ko‘rib ishlayotgan va iqtisodiy nochor suv ta’minoti korxonalarini moliyaviy sog‘lomlashtirish bo‘yicha “yo‘l xaritalari” dasturi tasdiqlandi. Bu haqda Norma.uz xabar berdi.
Unga ko‘ra, korxonalarning zararlilik darajasi iste’molchilarni qamrab olish, suv o‘lchash uskunalarini o‘rnatish, shuningdek qishloq aholi punktlarida suv quvurlari orqali yetkazib beriladigan suv hisobini yuritish evaziga kamaytiriladi.
Shuningdek, ushbu davr mobaynida yangi suv-kanalizatsiyasi tarmoqlari va obyektlari quriladi, mavjudlari esa ta’mirlanadi. Bundan tashqari, foydalanish muddatini o‘tab bo‘lgan nasos va elektrotexnik qurilmalar zamonaviy, energiyani tejovchi uskunalar bilan almashtiriladi. Eskirgan mashina va mexanizmlar ham ekspluatatsiyadan chiqariladi. Qarorda 2016-yilgacha suv ta’minoti korxonalarining debitorlik qarzlarini kamaytirish ko‘zda tutilgan.
Hukumat qarorida sovuq suv hisobi bo‘yicha o‘lchagichlarga texnik xizmat ko‘rsatish, jumladan ularni o‘rnatish, ta’mirlash, tekshirish ishlari iste'molchilar mablag‘lari hisobidan yagona o‘rnatilgan narxda moliya tashkilotlari bilan kelishilgan holda amalga oshirilishi nazarda tutilgan.
Dastur ijrosiga “O‘zkommunxizmat” agentligi, Qoraqalpog‘iston Respublikasi Vazirlar Kengashi, viloyat hokimliklari va suv ta’minot korxonalari mas’ul etib belgilandi.
Izoh (0)