O‘zbekistonda uzoq muddatli davrda atom elektr stansiyasi qurilishi rejalashtirilmayapti. Bu haqda “O‘zbekenergo”ga tayanib, “Noviy vek” nashri xabar berdi.
Avvalroq xorij OAVlari orqali yaqin yillarda O‘zbekiston hukumatining respublika shimoli-sharqiy qismida atom elektr stansiyasini qurishni rejalashtirayotgani haqida xabarlar tarqalgan edi, deb yozadi Anhor.uz.
“O‘zbekenergo” xabarida aytilishicha, ushbu ma’lumot haqiqatga to‘g‘ri kelmaydi. Kompaniyaning istiqboldagi rejalarida atom elektr stansiyasini qurish ko‘zda tutilmagan.
Anhor.uz qayd etishicha, AES qurilishi O‘zbekiston 1993-yildan buyon rioya qilib kelayotgan yadrodan xoli hudud konsepsiyasiga ziddir.
Joriy yilning aprel oyida Xitoy, Fransiya, Rossiya, Buyuk Britaniya va AQShdan iborat beshta yadro mamlakatlari qaror imzoladi. Unga ko‘ra, ushbu davlatlar Markaziy Osiyo mamlakatlariga qarshi yadro quroli ishlatmaslik, tahdid qilmaslik yoki ushbu hududda yadro quroli bilan bog‘liq ishlab chiqishni amalga oshirmaslik majburiyatini oldi.
Kelishuv O‘zbekiston, Qozog‘iston, Qirg‘iziston, Tojikiston va Turkmanistondan iborat Markaziy Osiyoni “Yadro qurolidan xoli hudud” sifatida tan oladi.
Izoh (0)