O‘zbekistonlik Opera Mini brauzeri foydalanuvchilari mobil internetdan 2014-yil boshidan har oyda o‘rtacha 700 ming dollar tejamoqda. Bu haqda Opera Software kompaniyasi ma’lumotlariga tayanib UzDaily xabar berdi.
Hisob-kitob O‘zbekistonda Opera Mini foydalanuvchilarining yuz foizi internet-trafikka megabayt bo‘yicha to‘lashini nazarda tutib qilindi. Tejash hajmi esa Opera Mini foydalanuvchilari tomonidan tejalgan veb-trafika miqdori, shuningdek 1 Gb uchun 9 dollar deb belgilangan o‘rtacha bozor narxidan kelib chiqib hisoblandi.
Shu tariqa, 2014-yilning birinchi olti oyida o‘zbekistonlik Opera Mini foydalanuvchilari mobil internet bo‘yicha 4,2 million dollar tejab qolishdi. Bunday tejamkorlikka Opera Mini’da mavjud bo‘lgan ma’lumotlarni siqish texnologiyasi yordamida erishildi. U yetib kelayotgan fayllarni boshlang‘ich hajmining 10 foizigacha kichraytirib beradi.
Opera Mini brauzeri Android, Apple va Java bazasida ishlaydigan uch mingdan oshiq mobil qurilmalarga mos tushadi. Yaqinda Opera iPhone va iPad uchun butunlay yangicha interfeysga ega bo‘lgan Opera Mini 8 yangilanmasini taqdim etdi.
Izoh (0)