Birlashgan Arab Amirliklarining O‘zbekistondagi BM Store savdo belgisi ostida faoliyat yurituvchi kompaniyasi poytaxtda ilk marta matbuot anjumani o‘tkazdi. U asosan Facebook ijtimoiy tarmog‘ida noto‘g‘ri o‘tkazilgan onlayn-tanlov bo‘yicha kelib chiqqan nizolarga bag‘ishlandi, deb yozadi Podrobno.uz.
Tanlov shartlariga ko‘ra, foydalanuvchilar yozni qanday o‘tkazishi haqida rolik suratga olib, uni BM Store sahifasiga joylashi kerak bo‘lgan. Eng ko‘p “layk” yig‘gan ishtirokchini g‘oliblik va Samsung Galaxy K zoom smartfoni kutgan.
Avvaliga 6—30-iyun kunlariga belgilangan muhlat, tanlov so‘nggi kuniga kelib, 1-iyulgacha cho‘zilgan. Natijada, 30-iyun kuni eng ko‘p “layk” yig‘ib turgan foydalanuvchi Anton Kimdan ertasi kuni boshqa foydalanuvchi Maksim Gajiyev “layk”lar soni bo‘yicha o‘zib ketgan.
Internetda avj olgan shov-shuvdan xabar topgach, kompaniyaning Dubaydagi bosh ofisi tanlov natijalarini tan olmagan va uni qaytadan o‘tkazishni buyurgan. Biroq Gajiyevdan bosh sovrin olib qo‘yilmadi, natijadan norozi bo‘lgan qolgan ikki ishtirokchiga faollik uchun Samsung Galaxy S4 mini smartfonlari taqdim etildi.
BM Store vakillari matbuot anjumanida tanlov o‘tkazishda omilkor bo‘la olmaganlarini tan oldi va endi ovozlarni hisoblashda diqqatli bo‘lishga va’da berdi. Kompaniya navbatdagi tanlovni yaqin orada o‘tkazadi, biroq uning shartlari hozircha noma’lum.
Izoh (0)