AQSh sudi Texas shtatida istiqomat qiluvchi sobiq aktrisa Shennon Richardsonni hayot uchun xavfli ritsin zaharini tayyorlab, uni prezident Barak Obama va Nyu-Yorkning sobiq meri Maykl Blumbergga maktub orqali jo‘natgani uchun 18 yillik qamoq jazosiga mahkum qildi. Bu haqda “ITAR-TASS” xabar berdi.
Zaharli maktub 2013-yil may oyida Luiziana shtatidagi Shrivport shaharchasidan yuborilgan. 7-iyun kuni esa 36 yoshli Richardson Shrivportdan 160 kilometr uzoqlikdagi Nyu-Boston shahrida qo‘lga olingan. Yuborilgan maktublarda o‘qotar qurollar savdo-sotig‘i ustidan qattiq nazorat o‘rnatgani uchun sobiq mer va prezidentga qaratilgan tahdidlar yozilgan.
Prokurorlarning aytishicha, aktrisa avvaliga o‘z aybini turmush o‘rtog‘iga qo‘yish niyatida politsiyaga erining kompyuteridan ritsin zaharini tayyorlash bo‘yicha qo‘llanma, shuningdek, Obama va Blumberg haqida ma’lumot topib olganini aytgan. Biroq u yolg‘onni aniqlovchi qurilma testidan o‘tkazilgach, maktubni aktrisa jo‘natgani aniqlandi.
Olti farzandning onasi bo‘lgan Richardson dekabr oyida jazoni yengillashtirish uchun aybini tan olgan.
Ma’lumot uchun, Shennon Richardson “Vampir kundaligi” (The Vampire Diaries), “Tirik murdalar” (The Walking Dead) va “Mushkul ahvolda” (The Blind Side) singari filmlarda rol ijro etgan.
Izoh (0)