O‘zbekiston tadbirkorlari kommunal xizmatlarni yetkazib berishdagi muammolar yuzasidan Yagona interaktiv davlat xizmatlari portaliga murojaat qilishlari mumkin bo‘ldi.
Markazlashgan monitoring xizmati Portaldagi murojaatlarning Xususiylashtirish, monopoliyadan chiqarish va raqobatni rivojlantirish davlat qo‘mitasi va uning quyi tashkilotlari tomonidan o‘z vaqtida va sifatli ko‘rib chiqilishini ta’minlaydi.
Tadbirkorlar, xususan suvning kuchsiz bosimi, issiq suvning past harorati, elektr energiyasi va gazning ogohlantirishlarsiz uzib qo‘yilishi, oqova suv muammosi yoki chiqindilarning o‘z vaqtida olib ketilmasligi kabi holatlar ustidan shikoyat qilishlari mumkin.
Shu bilan birga, arizachilar shikoyatlarni ko‘rib chiqish sifatini baholash va o‘zlarining fikr-mulohazalarini qoldirish imkoniga ega bo‘lib, mazkur imkoniyat kelgusida davlat tashkilotlari faoliyatini takomillashtirishga, shikoyatlarni ko‘rib chiqishda ishtirok etgan hamda kelib tushgan murojaatlarga yuzaki e’tibor bergan mas’ul xodimlar ustidan chora ko‘rilishiga yordam beradi.
Mazkur xizmat O‘zbekiston Respublikasi Prezidentining 2014-yil 15-apreldagi PQ-2164- sonli “Tadbirkorlik faoliyatini amalga oshirish va davlat xizmatlarini ko‘rsatish bilan bog‘liq tartibotlarni yanada takomillashtirish chora-tadbirlari to‘g‘risida”gi Qarori ijrosini ta’minlash doirasida joriy etilgan.
Izoh (0)