Ўзбекистон тадбиркорлари коммунал хизматларни етказиб беришдаги муаммолар юзасидан Ягона интерактив давлат хизматлари порталига мурожаат қилишлари мумкин бўлди.
Марказлашган мониторинг хизмати Порталдаги мурожаатларнинг Хусусийлаштириш, монополиядан чиқариш ва рақобатни ривожлантириш давлат қўмитаси ва унинг қуйи ташкилотлари томонидан ўз вақтида ва сифатли кўриб чиқилишини таъминлайди.
Тадбиркорлар, хусусан сувнинг кучсиз босими, иссиқ сувнинг паст ҳарорати, электр энергияси ва газнинг огоҳлантиришларсиз узиб қўйилиши, оқова сув муаммоси ёки чиқиндиларнинг ўз вақтида олиб кетилмаслиги каби ҳолатлар устидан шикоят қилишлари мумкин.
Шу билан бирга, аризачилар шикоятларни кўриб чиқиш сифатини баҳолаш ва ўзларининг фикр-мулоҳазаларини қолдириш имконига эга бўлиб, мазкур имконият келгусида давлат ташкилотлари фаолиятини такомиллаштиришга, шикоятларни кўриб чиқишда иштирок этган ҳамда келиб тушган мурожаатларга юзаки эътибор берган масъул ходимлар устидан чора кўрилишига ёрдам беради.
Мазкур хизмат Ўзбекистон Республикаси Президентининг 2014 йил 15 апрелдаги ПҚ-2164- сонли «Тадбиркорлик фаолиятини амалга ошириш ва давлат хизматларини кўрсатиш билан боғлиқ тартиботларни янада такомиллаштириш чора-тадбирлари тўғрисида»ги Қарори ижросини таъминлаш доирасида жорий этилган.
Изоҳ (0)