Ўзбекистонлик ФИФА рефериси Бразилияда давом этаётган футбол бўйича ЖЧ-2014да иккинчи ўйинга тайинланув олди.
ФИФА расмий сайти маълумотига кўра, Равшан Эрматов «А» гуруҳи 3-тур доирасидаги Мексика – Хорватия учрашувини бошқаради. Ўйин Тошкент вақти билан 24 июнга ўтар кечаси, соат 1:00 да бошланади.
«Кун» берган маълумотга кўра, Мексика – Хорватия учрашувида Эрматовга қанотларда ўзбекистонлик Абдуҳамидулло Расулов ва қирғизистонлик Баҳодир Қўчқоров ёрдам беради. Тўртинчи ҳакам сифатида камерунлик Алиум тайинланган.
Эрматов бошчилигидаги бригада бунгача ЖЧ-2014 гуруҳ босқичи 1-тур ўйинлари доирасида Швейцария – Эквадор (2:1) ўйинида ишлаган эди. Ўша ўйиндаги ҳаракатлари ва қарорлари учун ўзбекистонлик рефери WorldReferee.com сайти томонидан ЖЧ-2014 гуруҳ босқичи 1-турининг енг яхши ҳаками деб топилди.
Мексика ва Хорватия терма жамоалари ўртасидаги ЖЧ-2014 «А» гуруҳи 3-тур учрашуви энг қизиқарли ва муҳим баҳслардан бири ҳисобланади. Ҳозирги вақтда Мексика терма жамоаси ҳисобида 4, Хорватия ҳисобида эса 3 очко бор. Ўйинда қайси жамоа ғалаба қозонса, ўша плей-оффга чиқади, дуранг натижа Мексика термаси фойдасига ишлайди.
Шунингдек, ушбу гуруҳдан мусобақа мезбони Бразилия ҳам ўрин олган бўлиб, унинг ҳисобида ҳам 4 очко бор ва у сўнгги турда ауцайдер Камерунга қарши баҳс олиб боради. Мутахассислар ушбу ўйинда Бразилия терма жамоаси имкониятларини юқори баҳолашмоқда.
Эътиборли томони, Эрматов футбол бўйича жаҳон чемпионатлари финал босқичларида Мексика терма жамоаси иштирокидаги ўйинни иккинчи бор бошқармоқда. Бунгача, Эрматов бригадаси ЖАРда бўлиб ўтган ЖЧ-2010да Мексика ва ЖАР терма жамоалари ўртасидаги очилиш ўйинини (1:1) бошқариб борганди. Ўша мусобақада Эрматов жами бешта ўйин (гуруҳ босқичида учта, ва биттадан чорак финал, ярим финал ўйинлари)ни бошқарганди.
Изоҳ (0)