O‘zbekiston 2014-yilda boshoqli don ekinlaridan 7 — 7,2 million tonna hosil olmoqchi, deya xabar berdi “Noviy vek”. Shu haftada boshlangan g‘alla o‘rim-yig‘imi yakunlari avgust oyida jamlanadi.
O‘zbekiston qishloq va suv xo‘jaligi vazirligi vakilining aniqlik kiritishicha, prezident Islom Karimovning joriy yil 22-mayda qabul qilingan 2014-yilda boshoqli don ekinlari hosilini yig‘ishtirib olish bo‘yicha tashkiliy chora-tadbirlarga oid qaroriga muvofiq, davlat ehtiyojlari uchun g‘alla sotib olish hajmi 2013-yil darajasida qolgan va ishlab chiqarilgan mahsulotlar hajmining 50 foizini tashkil qiladi.
O‘zA yozishicha, g‘allakorlarimiz bu yil bir million uch yuz gektardan ziyod maydonda serhosil va ertapishar g‘alla navlarini parvarishladi. Ayni paytda omilkor dehqonlar butun diqqat-e’tiborini yetishtirilgan mo‘l hosilni qisqa muddatda, nest-nobud qilmay o‘rib-yig‘ib olishga qaratmoqda.
O‘zbekiston Qishloq va suv xo‘jaligi vazirligidan olingan ma’lumotlarga ko‘ra, g‘alla o‘rim-yig‘imi ishlarini uyushqoqlik bilan o‘tkazish maqsadida 1 ming 852 otryad tashkil etilib, ularga turli sohalar bo‘yicha 19 mingdan ortiq mutaxassis biriktirilgan. 19 ming 500 dan ziyod kombayn, g‘alla tashuvchi mashina va boshqa texnika vositalari shay holatga keltirilgan. Shuningdek, 1 ming 300 dan ziyod ko‘chma ustaxona va 1 ming 600 ga yaqin yonilg‘i tashish texnikasi kombaynlarning to‘xtovsiz ishlashini ta’minlaydi.
Izoh (0)