Toshkent axborot texnologiyalari universitetining to‘rtinchi bosqich talabasi Jamshid Saidov “kiborg qo‘l” loyihasini yaratdi, deb yozadi «Turkiston-press» axborot agentligi.
Diplom ishi sifatida tayyorlagan bu ixtirosini u “Kamolot” YoIH tomonidan tashkil etilgan “Zamonamiz qahramonlari” mavzusidagi davra suhbatida ilk bor keng jamoatchilikka havola etdi.
Ushbu “kiborg qo‘l” inson qo‘lidan aslo farq qilmaydi. Harakatlanuvchi mexanizmi temir murvatlardan iborat bo‘lsa-da, biologik xomashyodan tayyorlangan suyaklar, to‘qimalar va teri bilan qoplangan. Bu mexanizm maxsus dastur yordamida boshqariladi.
— Har bir loyihani yaratishimga hayotda ko‘rgan-kechirgan voqealarim, kuzatishlarim sabab bo‘ladi, — deydi Jamshid Saidov. — Men tug‘ma nogiron yoki qo‘l-oyog‘i amputatsiya qilingan yurtdoshlarimni ko‘rganda, inson tanasidagi a’zo o‘rnini bosadigan, ularning hayotga moslashuviga yordam beradigan “kiborg qo‘l” yoki oyoq yaratishni niyat qilgandim. Mana, bu yil shu orzuimga erishdim va diplom ishi sifatida bu loyihani ishlab chiqdim. To‘g‘ri, amputantlarga o‘rnatiladigan protez qo‘l va oyoqlar ancha oldin o‘ylab topilgan. Ammo ularning barmoqlari harakat qilish imkoniyatiga ega emas. Mening loyiham asosida ishlangan “kiborg qo‘l”ning esa barmoqlari bemalol harakat qiladi va ular yordamida ma’lum buyumlarni, predmetlarni ushlash ham mumkin.
Yosh ixtirochi shu kungacha chegara hududlaridan olib o‘tilayotgan yuklar xavfsizligini tekshiruvchi “robot-sapyor”, chaqaloq yig‘lagani haqida onasiga telefon orqali xabar yetkazuvchi o‘zi tebranadigan beshik, uyali telefonga o‘rnatilgan dastur yordamida boshqariladigan gumanoid-robot va boshqa bir necha texnik ishlanmalar loyihasi hamda maketini yaratgan.
Izoh (0)