Jahon banki O‘zbekiston YaIM hajmi 2014-yilda 7 foizga o‘sishini prognoz qildi
O‘zbekiston iqtisodiyoti 2014-yilda 7 foizga o‘sadi. Bu haqda Jahon bankining 10-iyun kuni e’lon qilingan “Global iqtisodiy istiqbollar” hisobotida so‘z boradi. Bu haqda Kun.uz xabar berdi.
UzDaily’ning qayd etishicha, 2014-yil yanvarida ham Jahon banki O‘zbekiston yalpi ichki mahsuloti (YaIM) hajmi yil davomida 7 foizga o‘sishini prognoz qilgandi. Jahon banki mutaxassislarining prognozlariga ko‘ra, O‘zbekiston iqtisodiyoti 2015-yili 6,7 foizga, 2016-yili ham 6,7 foizga o‘sadi.
Yanvar prognozlari bilan taqqoslaganda, Jahon banki ekspertlari fikrida o‘zgarish bo‘lmagan. Jahon bankining qayd etishicha, gaz eksporti O‘zbekiston iqtisodiyoti o‘sishini ta’minlab beradi. Biroq paxta va oltin narxining pastligi, shuningdek, asosiy eksport bozorlari (xususan, Rossiya, Turkiya, Ukraina va Xitoy)dagi iqtisodiy vaziyatning yaxshi emasligi so‘nggi 10 yildagi kabi yiliga 8 foizlik iqtisodiy o‘sish ko‘rsatkichlarini saqlab qolishga xalal beradi.
Jahon bankining qayd etishicha, 2014-yilda O‘zbekiston eksporti 3,9 foizga o‘sadi. Eksport hajmi 2015-va 2016-yillarda 4,5 foizga o‘sishi taxmin qilinmoqda. Bank prognozlariga ko‘ra, O‘zbekiston importi 2014-yilda 9,5 foizni, 2015-yilda 7,9 foizni va 2016-yilda 6,2 foizni tashkil etadi.
Ma’lumot uchun, O‘zbekiston hukumati prognozlariga ko‘ra, 2014-yilda mamlakat iqtisodiy o‘sishi sur’atlari 8,1 foiz bo‘lishi kutilmoqda. Aprel oyida Osiyo Taraqqiyot banki O‘zbekistonda YaIM 2014-yilda 8 foizga o‘sishini taxmin qilgandi.
