Amerikaning Apple korporatsiyasi o‘z aksiyalarini 1 ga 7 hisobida maydaladi, deya xabar berdi “ITAR-TASS”.
6-iyun kuni Apple aksiyadorlari o‘zlariga tegishli har bitta qimmatbaho qog‘oz uchun qo‘shimcha oltitadan aksiyaga ega bo‘ldi. 2014-yil aprel holatiga ko‘ra, Apple chiqargan aksiyalar 861,38 millionta bo‘lgan bo‘lsa, bo‘linish natijasida ularning soni 6 milliarddan oshdi.
O‘tgan juma kuni Apple aksiyalarining narxi NASDAQ birjasida har bitta qog‘oz uchun 556,08 dollarni tashkil etgan edi, endi ular 100 dollardan kam qiymatga ega bo‘ldi.
Aksiyalarni maydalash bilan kompaniya ularning bozor narxini pasaytiradi, biroq oldi-sotdi uchun qog‘ozlar sonini ko‘paytiradi.
Kompaniyaning oladigan daromadiga qarab belgilangan qiymati (kapitalizatsiya) o‘z holicha qoldi, biroq bitta aksiyaning narxi tushirilishi ko‘proq investorlarni jalb qiladi.
Korporatsiya aksiyalarni o‘n yil ichida birinchi marta maydaladi.
Izoh (0)