Himolay tog‘larida muzli daraga tushib ketgan amerikalik alpinist Jon Oll Facebook’ga joylagan statusi yordamida qutqarildi. Bu haqda Metro nashri xabar berdi.
19-may kuni qoyaga chiqish bilan qiziqadigan 44 yoshli geografiya o‘qituvchisi Jon Oll dengiz sathidan 6 ming metr balandlikdagi tog‘li muzlikka ko‘tarilgan, biroq surinib ketib, 25 metr chuqurlikdagi daraga tushib ketgan. Natijada yelkasi chiqqan, beshta qovurg‘asi, tizzasi va tirsagi singan. Jon tog‘da yolg‘iz bo‘lgan.
Darada yotgan alpinist telefonida internet ishlayotganini bilib qolgan va Facebook’dagi American Climber Science Program guruhiga xabar joylab Xalqaro qutqaruv xizmatini chaqirishlarini so‘ragan. Guruh a’zolari uning iltimosini bajarishgan. Qutqaruvchilar yetib kelguniga qadar Facebook’dagi sahifasida video, surat va statuslar bilan o‘z ahvolini bildirib turgan. U Katmandudagi shifoxonaga yotqizilgan. 21-may kuni davolanib chiqib uyiga yetib borganidan so‘ng Jon ijtimoiy tarmoqda uni qo‘llab-quvvatlaganlarning barchasiga tashakkur izhor etdi.
Izoh (0)