Kemerovolik talaba qiz chaqiriq punktiga portlovchi moslama o‘rnatilgani haqida yolg‘on xabar bergani uchun hibsga olindi. Xabarning uydirma ekani aniq bo‘lgunicha, punktdan 350 kishi, jumladan 269 nafar harbiy xizmatga chaqiriluvchilar evakuatsiya qilingan. Bu haqda “ITAR-TASS” xabar berdi.
Payshanba kuni portlovchi moslama haqida xabar kelib tushgach, Kemerovodagi harbiy komissariatning to‘planish punkti qurshab olingan, shahar shoshilinch xizmati ham yetib kelgan. Biroq hech qanday portlovchi uskuna ham, bunday modda ham topilmagan.
Tergovlar davomida Kemerovo universitetlarining birida ta’lim oluvchi 19 yoshli qiz qo‘lga olingan. U bunday xatti-harakatni armiyaga chaqirilgan yigiti bilan ayrilishni istamagani uchun amalga oshirganini e’tirof etgan.
Ayni paytda unga nisbatan Rossiya Federatsiyasi Jinoyat Kodeksining “Terrorchilik akti haqida yolg‘on ma’lumot berish” moddasi bo‘yicha jinoiy ish qo‘zg‘atilgan. Talaba qiz uch yilgacha ozodlikdan mahrum etilishi mumkin.
Izoh (0)